Ohh...là! Finalmente xe finia sta solfa. L'Inter ga vinto la Cempion. Gavemo visto na finale con do squadre che, una par on motivo, una par on altro, non le dovea stare lì.

El Bayer xè sta lì par caso (e se ga visto...) dopo aver recuperà sol Mancester con na bota de culo pazzesco e dopo aver eliminà la Fiorentina robando a man bassa con on gol che anca me nono gavaria anulà par fuori gioco.

L'Inter se ga catà lì dopo che i ghe gà eliminà el Celsi (no che lo gavia eliminà lori) no dandoghe du rigori al'andata e du riguri al ritorno. Dopo, l'impresa col Barcelona ( e torna el discorso che co se xe fanatici non pole essarghe imparzialità) la xe sta caraterizà da on gol so neto fuorigioco, contro na squadra che se gavea fato in pulman tuta la strada par rivare a Milan. Al ritorno, a du minuti dala fine i ghe gà anulà el gol che i gavaria mandà fora par un falo de man, che se fusse sta a parti invertie gavaria fato lanciare a Murigno fogo e fiame anca par el culo.

In pratica, l'Inter xe drio godarse la so richeza sportiva come on poro can podaria godarse na mota de schei catà so on tacolin perso drio la strada. Sempre richeza, la xe, ma acquisia non tanto par meriti propri e non del tuto onesta.

Va ben... a vedare tuti i festegiamenti che i xe drio fare desso... ghe xe solo da compatirli par tuti sti decenni in cui i ga solo visto quei altri vinzare e festegiare... i xe da capire, dai.

El fenomeno Murigno l'è drio deventare na roba ormai incontrolabile...

Go on amico interista che me ga dito " se mi fusse na dona a voria proprio on omo come Murigno".

A ghe go dito: "Te podarissi volerlo anca essendo on omo"...

e lo go assà lì pensieroso.

Mi penso che, al di là del modo de essare de ognuno de noialtri, Murigno sia on furbon che sfruta al meio la so posizion, ma sopratuto el fato che i tifosi, genericamente, xe na massa informe de ignoranza.

Questa xe la me opinion, oviamente, ma penso che quela dei tifosi sia una categoria con el più alto indice de ignoranza e imbecillità che ghe sia.

Qua podaria subentrare la famosa equazion "Popolare = ignoranza".

Ve sio mai domandà parché el calcio l'è cussì popolare?

Parché anca el pì indrio dela coà pole dire la soa pretendendo de avere la verità assoluta. Nei bar non se parla de filosofia o de storia del'arte. Se parla de calcio, che i argomenti e argomentatori non manca mai.

Questo par tornare al discorso de Murigno, chel sa ben come fare par "manovrare" ste masse poco acute. Con le dovute proporzion, la stessa politica de manovrare le masse che ga segnà anni de dittatura in varie parte del mondo. Più uno xe ignorante e più te poli portarlo dala to parte assandolo convinto che la sia una sua libera scelta.

Alora: Murigno furbo e Leonardo stupido? Eh, sì, in base a sti principi qua, se podaria dire proprio questo. Cossa serve fare discorsi improntà al rispetto altrui e alla supposizion che chi che ascolta i to discorsi sia ala to altezza? Questo porta le masse a dire che uno non ga carattere, solo parché nol se erge a sovrastare e calpestare le masse. Le masse ignoranti non le vole interlocutori alla so altezza, parché sennò i ghe dise che i manca de carattere. Le masse le vole che ghe sia chi che ghe indica come fare e come comportarse nele varie situazion.Le masse le vole essare guidà e comandà.

Par la considerazion che go de certe figure, spero proprio che presto Murigno gavia na bela batuta d'aresto. Anca par amore del me amico interista.