Provemo a rancurare, so sta pagina qua, i vari articoleti che, domenega dopo domenega, vegnarà scriti sui avenimenti sportivi.
A fine staion vedemo che efeto che farà andare a rivedarseli.
31 genaio 2010 - Domenega passà son stà invità a San Siro da on sponsor del campionato de calcio.
La partia no xe sta on gran chè. On Milan Livorno finia 1 a 1 con poco bel zugo. In compenso, go avù modo de stare in mezo a tanta bela gente e vedare i zugadori del Milan da talmente arente da scoltare chiaramente anca tutti i discorsi privati che xe vegnù fora in tel pre gara. Ghe son sta tacà anca piassè de quelo che gavaria volesto… Talmente tacà da sentirghe anca l'odore… e sinceramente, podea anca risparmiarmelo. Son stà al salon de l'ospitality dove che ghe gera on ben de Dio da magnare e anca da bevare … tuto a scroco se intende. In prima fila, a farse largo a forza de spintoni, so fradelo de Ronaldigno, che da bravo procuratore, el gera in mission par procurarghe da magnare.
Tra tanta gente alegra, però, ghe gera anca qualche d'un de particolarmente zo. Go visto Pelegati che, picoleto e spenotà, parea chel gavesse tante gate da pelare. Dopo ghe gera diversi zugadori che, non podendo ciapare i aplausi in campo, i vegnea in zerca de gratificazion so sto salon. Odo e Fiori ad esempio. Qualche d'un dirà: è chi xei questi? Beh… ghe do rason!
6 genaio 2010
Baloteli me ga roto le bale
Sarà che, essendo veneto go na particolare simpatia par el Chievo, sarà che za me dà fastidio aver visto sto mandolon che a ogni tocadina el se butava sempre par tera come se i lo gavesse copà, ma dopo la partia, chel vegna a dire che Verona ghe fa schifo parché nol lo ga gnancora capio da darghe on taio co la storia del razismo, che basta chel se varda atorno tra i compagni dela so squadra che pì che italiana la pare del Camerun... cossa dirli i so compagni de colore? E po, el vien fora de Verona... parché, a Torino? e a Roma?
Se inveze de recitare tanto la parte del'ofeso el ghe fesse fare on poca de atività a chel poro neurone chel ga sola testa e chel sofre de orenda solitudine, forse el rivaria a domandarse el parché de tanti fischi e de come chel ghe faga roventare i cocoricò a tuti quei che non lo soporta pì...
Alà, Baloteli... forse xe meio che te te s-ciari on poco...
le idee!
25 dicembre 2009
BON NATALE
Nemo verso l'ano del mondiale de calcio... Da na parte spero che l'Italia possa far ben, da chel'altra me faria on poco de fastidio parché Lipi el me sta on fià tanto sui cocoricò. Vedaremo...
...a proposito de personagi che me sta sui cocoricò, n'altro xe Siumacher... za el ga ciucià on fracasso de schei ala Ferari (che vol dire ala Fiat che vol dire a tuti noialtri).
El cruo de Montezemolo el lo ga impinà de schei (mi lo impinaria de calcossa altro) parché chel faga l'omo imagine dela Ferari e desso, quanto elo sta a saludare e nare dove che lo porta el portafoglio? Spero solo che stano che vien, Rosberg el ghe faza fare qualche bruta figura, anca se sarà impossibile che in squadra non i fassa le preferenze... elora spero tanto che Alonso el ghe daga le cane (de Massa, poareto, non ghe ne fo conti: l'è solo on intrigo).
Va ben... vedaremo. Desso nemo a magnarse na feta de paneton...
13 dicembre
Ma che brute robe...
Na setimana fa scrivea de on paro de bei episodi che gavea marcà la vita civile del paese. Adesso me toca fare marcia indrìo par el fato che, senz'altro, tegnarà banco par i prossimi giorni: l'agression a Berlusconi.
Come se dise " la mama dei imbezili xe sempre incinta" e ghe xe sempre el deficiente de turno che crede da essare l'eroe dela situazion.
Purtropo, al di là dele proprie preferenze politiche (diria le stesse robe anca se l'agression la gavesse subìa on rapresentante de qualsiasi altro schieramento) in Italia ghe xe na vasta parte de popolazion che sguazza ne l'ignoranza e, de conseguenza nela deficienza e nela violenza. Parchè la deficienza deriva da l'ignoranza (uno che non conosse, che non ga conoscenza, deficita de calcossa, per cui l'è on deficiente) e la violenza deriva dala deficienza. Un violento l'è sempre un deficiente: SEMPRE!
E certi politici (certi partiti) non i fa altro che coltivarse e assicurarse la poltrona istigando e dandoghe corda a sta massa de deficienti.
Mah... speremo, almanco, che sto fato serva a ridimensionare e calmare i animi. Non pole essarghe divergenza de qualsiasi tipo che giustifica la violenza.
E, se posso permetarme na assonanza, diria che in te sto caso el mondo del calcio ghe dà un insegnamento al mondo dela politica. Quando a seguito de una provocazion un zugadore colpisce un aversario, a essare espulso e ritenu colpevole xe quelo che reagisse al'istigazion. Quindi, xe meio che qualche d'un el faga discorsi diversi piutosto che andare in giro a dire che berlusconi istiga la violenza. Oviamente adesso, dopo che qualche d'un ghe ga dito che ste robe xe meio non dirle, el ga fato marcia indrio. Ma indrio xe solo elo. E penso che pochi non sapia a chi che me riferisso.
Ma che bele robe...
6 dicembre 09
Al de là del fato che xe on ben che el campionato adesso ga na classifica pì corta là davanti,
de sto fine setimana do robe me xe piaseste tanto.
La prima xe quela che vede on gran risultato per le forze de l'ordine.
A Palermo i ga ciapà on mafioso de quei importanti che xe na disgrazia par tuti.
Quelo che me xe piasesto tanto xe sta vedare tuta la gente che xe ndà a far festa davanti ala sede de chele forze del'ordine che ga avu el merito dela catura.
Tanti zovani che saltava e cantava. Belissimo! Secondo mi xe on gran segnale.
Chelaltra roba (on poco pì legera) xe sta el gesto de Bepi Pilon, alenatore de l'Ascoli che, dopo aver fato on gol con i aversari dela Regina praticamente fermi parché i volea butar fora la bala par via de uno che se gavea fato male, ala ripresa del zugo el ga fato paregiare la Regina assando i omani fermi in campo.
Bravo Bepi, anca parché la so squadra non la xe messa tanto ben in classifica e sta partìa qua dopo i la ga persa. I punti i ghe serve da mati, ma i ga fato ugualmente on bel gesto davero.
Che sia l'aria del Natale?
Mah..
08 novembre
Inter 1 - 1 Roma
Cossa go da fare? L'analisi de Inter - Roma?
Beh... elora, soto certi aspeti l'Inter ga stradominà
ad esempio sul numero dei fali fati, sul numaro dei zugadori messi fora uso (quei de chel'altra squadra, se intende) e, sempre e unica dominatrice, sul piano dela simpatia.
La tatica dela partia gera molto semplice. Na Roma za in dificoltà par le tante assenze, bisognava ridurla ai minimi termini, metendoghe fora uso tuto quelo che ghe restava.
Gnente da dire... i omani de Murigno ga fato el so dovere.
Quelo che non lo ga fato, secondo mi, xe sta l'arbitro: sarà sta par non barufare con Murigno...
Mi penso che certe situazion le sia vergognose...
Lo ga dito anca Ranieri, ma Murigno ga pì risonanza sui organi de stampa e le television.
Credime: dopo aver visto na partia de calcio un'ora prima (Chelsea - Manchester U.) questo de Inter - Roma non me pare gnanca lontanamente calcio.
Se la direzion del zugo moderno del calcio xe questo, a mi nol me piase... e me acorzo sempre pì spesso che preferisso el calcio straniero (inglese e spagnolo sopratuto) a scapito de quelo italian.
Va ben... tiremo avanti...
Martedì 3 novembre
Ostrega... stasera go visto proprio na bela partia
Milan - Real la me xe proprio piasesta. Assemo stare el risultato... Ma proprio do bele squadre... El calcio come chel se ga da zugare!
Dopo, par television, go vardà la trasmission de Chiambreti dedicà ala pora Merini...
Me xe piasesta anca quela... sì sì... proprio na bela trasmission con protagonista la Merini che xe morta qualche giorno fa... Bel programma...
Bele sopratuto le poesie in musica... casso... me stupisso de mi! La poesia non xe mai sta la me passion, però...
Va ben...
Aprofitando de sto particolare stato d'animo che trovavo tuto de me gradimento, la me consorte me ga domandà se la zena gera sta de me gradimento...
La me ga ciapà ala sprovista, parché con la pressia de metarme comodo a vardare la partia, go mandà zò non so cossa in do minuti...
Comunque, par non scontentarla, ghe go fato on soriso ebete e ghe go dito "Buonissima. Non te ghè visto come che la go divorà?"
01 novembre 09
Murigno el ga dito che Santon l'è on toseto.
Ma come se permetelo?
El toso se ga risentio e co l'è nà a casa el ghe lo ga dito a so mama.
El Mancio ga rescisso el contrato co l'Inter.
Morati ga fato na bala.
Se adesso el Real inizia a vinzare confermando el so atuale alenatore,
Mancini de bale el se ne fa do. Alla schiacciasassi...
25 otobre 09
gnente de novo soto el sole
(e gnente alarmismi par l'influenza suina)
El campionato de calcio va avanti col so passo che xe giusto chel sia. Cioè, l'Inter xe in testa parché ga più culo dele altre, la Sandoria la va avanti ben grazie a Cassano, chel sarà anca bruto, ma de sti tempi el zuga proprio ben. La Juve la vinze da Juve a Siena, cioè col goleto che vale oro... tuto normale insoma...
Na roba sola me preocupa: el deterioramento dela condizion fisica dei marcantoni de l'Inter. Ieri sera, verso la fine dela partìa, quando che el Catania gà segnà el so gol, portando el risultato sol 2 a 1 par l'Inter, xe scumizià i sintomi de on malstare che ga colpìo uno drio l'altro, tuti i zugadori de l'Inter. A tri o quatro ghe xe vegnù la scagarela, a gente come Vierà e Baloteli ghe xe vegnù i malori estremi solo par essare sta tocà da un aversario... de quei atachi che non i se alzava più da in tera...gnente gnente i se taca a zigare... par fortuna, quando che l'arbitro ga fischià la fine dela partìa ghe xe passà tuto...
Beh, valà, meno male!
Me son ciapà proprio on bel spauroto, parché zerti elementi, a vardarli in facia, te vien proprio da dire "El ga el male suino" da tanto che i ghe someia al mas-cio.
21 otobre 09
seratona de Cempion Lig
finalmente xe rivà el tanto ateso momento de real Madrì - Milan
Verso le nove e cinque de stasera xe sucessa na roba alquanto strana. Ghe xe sta un rabaltamento grande sempre assè.
Gavìo presente come quando ghe xe le piramidi de baratoli? o i castei co le carte?
Basta che ceda una de quele soto che ghe xe on rabaltamento bruto.
Beh... stasera xe partio tuto da na bala che xe cascà. Par la precision, se trata dela bala che Dida parea chel ghesse fato sua, ma sicome che l'è sempre sta de na coordinazion esemplare (basta pensare de chela volta chel xe piombà in tera dopo che ghe xe parso d'aver ciapà na sventola da un invasore de campo: el ga pensà de butarse in tera tramortio quando che el colpevole de l'afronto el gera za tornà a casa dopo essarse fermà a l'ostaria a metà strada par bevare on cicheto e darghe na pissadina). Va ben, essendo questa la so coordinazion, ghe xe scapà la bala dale man (farabuta...) e quelo de chel'altra squadra, dopo essarse fato on ridòto, el ghe la gà butà in gol. Eco: xe cascà sta bala e, drioman, on cascamento de bale incontrolabile de tuti i milanisti sentà davanti la television.
Come che ga zugà el Milan, ga zugà anca la Juve.
A fine partia ghe gera da Scai Bufon e de tuti i giornalisti presenti, nessuni savea cossa domandarghe sola partia dela so squadra, parché tuti gavea vardà Real Madrì - Milan... e lora, non savendo cossa domandarghe, i ga parlà de quelo che gera sucesso prima del'inizio, quando che l'arbitro ghe ga vardà i tacheti ai zugadori... Tante volte capita da metarghe na peza a situazion imbarazanti, ma sta chì, proprio, la le supera tute
Domenica 17 otobre 09
ieri sera l'Inter ghe ne gà taca 5 al Genoa
Beh, insoma...
la xe la setimana dei antipatici...
Lipi che riesse a non perdare (e la xe na impresa) con i fortissimi ciprioti e desso murigno che vinze adiritura par 5 a zero con un Genoa bruto come la fame...
Va ben, portemo pazienza... Qualche sberlon el lo ciaparà anca elo, prima o dopo...
Se dopo ghe metemo el comento dela partià de Caressa e Bergomi che i fa parfin schifo par quanto de parte che i xe... par uno che no xe intarista, se riva a fine partia con i maroni proprio glassé.
Vista la stajon, acetemo anca quei....