Provemo a rancurare, so sta pagina qua, i vari articoleti che, domenega dopo domenega, vegnarà scriti sui avenimenti sportivi.
A fine staion vedemo che efeto che farà andare a rivedarseli.
Roba da mati... Soto de 2 gol col Cipro (oh, go dito col CIPROOOO), con el paregio ciapà in tei minuti de recuparo, el simpaticon de Lipi el ga el coraio de lamentarse se la gente che gera alo stadio la ga fischià e la ghe ga urlà "Andè a laorare". Ma, indrioto che non te sì altro, visto che i zugadori de Cipro i xe tuti calciatori a tempo perso e la matina dopo la partia i va a laorare, chi come idraulico, chi come latoniere, chi come paruchiere... a dirghe de andare a laorare ai nostri xe come farghe un incitamento a deventare bravi come i nazionali de Cipro. mah... Non se capisse, quando non se capisse, non se capisse.
....
Soto de 2 gol col strepitoso e incontenibile Cipro, grassie al so proverbiale culatelo el ga indrizà le robe e anca on par de banane (non so parché, ma lo vedo ben come indriza banane).
Ala fine, stremà dal sforzo (provè voialtri a indrizare banane) el s'à inalborà con quei de la Rai e el li ga piantà lì parché el ga dito che el publico non gavea esultà come chel se spetava par un'impresa del genere.
Ala fine el se ga rasserenà on poco parché i ghe ga promesso che el Dvd con la registrazion de la partìa el sarà alegà ala Gaseta de sabo che vien.
Par fortuna che nol ga capio ben che la Gaseta non xe la famosa Gaseta delo sport, ma la Gaseta de Pissatola...
beh...pitosto de gnente!!!!
(primi giorni de otobre 2009, Massa el decide de vegnere in Italia a provare on videogioco par vedare se l'è in grado de tornare a corare dopo chel se ga mezo orbà)
Par conto mio...
Quando che xe Massa xe Massa!
Ma nol podea miga star fora dai maroni par n'altro poco de tempo? Nol podea miga stare in Brasile a spetare che se fesse el Gran Premio de Interlagos? o forse chel circuito ghe xe poco simpatico par via de on ultimo giro de un ultimo gran premio de un ultimo mondiale? Eh... sì, sarà par quelo...
Anca se...ghe xe da dire che l'inatività a sto picoleto ghe fa male.
Co xe vegnu fora el discorso del'irregolarità del Gran Premio de Singapore de l'ano passà, quando che ga vinto Alonso dopo che Piquet xe na a sbarare su ordine de Briatore, cossa falo Massa (che, campion de ocasion perse, in te sto caso el ghe n'a perso una par taserghe). El salta fora che el mondiale ghe speta a elo parché la corsa no xe sta regolare e Alonso non dovaria aver vinto.
Ma quanto salado xelo? In te chel Gran Premio el se ga tirà drio el tubo del rifornimento e quatro mecanici par fermarse trenta metri pì avanti dopo aver fato la so porca figura in mondovision... e se anca i gavesse squalificà Alonso, Hamilton che gera rivà terzo el sarìa passà secondo e el gavaria vinto oncora pì comodo. La Ferari, uficialmente ga fato finta de gnente fasendo intendare che non la savea gnente dela sparada del picoleto.
Massa, caro dal segnore, scoltame mi: curate ben... no sta aver pressia de tornare... concentrate par st'ano che vien, quando Alonso te darà le cane...
e convinzate che, nonostante el to metro e vinti, te sì on grande...
Sì, on grande str....
5 otobre 2009
A Donadoni i ghe ga lavà el culo
El presidente del Napoli lo ga licensià
El campionato desso se ferma par farghe spassio alla nazionale.
Par conto mio...
Lipi l'è on volpon!
Par conto mio Lipi l'è on gran furbon: cossa galo fato? El ga intivà na serie de risultati messi al posto giusto e el ga fato el colpo dela vita.Nel senso che, con chele quatro partie (zugà da altri, arzonta) el se ga sistema par tuta la vita. Ma, da gran furbon quale che l'è, el ga dito "Come posso fare par sistemare anca el me neodeto e le sucessive quatordase generazion?"
Elo el sa ben che, dopo na vitoria e relativi incassi faraonici, catare zugadori che continua a vinzare xe praticamente impossibile. Eco, alora, chel mola. Eh, ciò... che galantomo... el vole lassarghe spazio ai zovani...
Che se fassa massacrare Donadoni par on europeo che matematicamente non podea andare ben. Assa chel cata fora elo qualche zovane da farghe fare esperienza... e dopo, quando che sarà ora de confronti, bastarà dire che son disposto a tornare a guidare la nazionale parché l'Italia intera e coiona aclama el me ritorno e, che la vaga come che la vaga, on bel saco de schei i porto a casa comunque.
Eh, sì ciò, andare in Sudafrica non xe miga on scherzo. Magari i me mete a dormire in te na baraca. E intanto Donadoni i lo ga fato fora anca dal Napoli...
Basta fare on confronto par capire el destin de uno, anca senza savere gnente altro:
Lipi, con la so facia antipatica e el sigaro in boca (mi ghe lo ficaria in te chel posto, e dala parte dela bronza)
Donadoni che non ga gnanca i schei da comprarse on siampo par lavarse i caveii... facia da sfigà...non xe el caso da infierire.
3 otobre 2009
L'Inter zuga l'anticipo del sabo contro l'Udinese. La squadra de Murigno loama el campo da quanto che la se la fa adosso par via dele azion pericolose del'Udinese ma, con on culo da far paura, l'Inter riesse a vinzare 2 a 1 segnando in tei minuti de recupero.
El pomerigio dela domenega toca al Milan che, a confronto de l'Inter pare na squaquareta (mentre quei de l'Inter xe dei bei stronzi solidi). El mercore de Cempions par el Milan xe sta poco eclatante: perso 1 a 0 col Zurigo ciapando on gol de taco da on emerito sconosciuto. Fato stà che la squadra de Leonardo ciapa gol dopo diese minuti e, anca sel zuga con on omo in più dal 38° del primo tempo, nol riesse a butarla dentro.
A sera zuga la Juve, grande squadra che pole ciapare la testa dela classifica e scumiziare la fuga par vinzare el campionato. Ma non i ga fato i conti con Micoli parché, dato che nol riva gnanca al banco per ordinare on spriz, non i lo gavea gnanca visto Do papine e tuti a casa.
3 otobre 2009
dopo che l'Inter ga vinto con l'Udinese 2 a 1 con on gol al 93esimo
El solito culo a strissie (neroazurre)
Pì se va avanti e pì sto Murigno el deventa simpatico... sì, proprio simpatico.
Ve xe mai capità de magnare erbete de campo e de catarve a mastegare on cimice fetente, che (furbo, elo) credea de avere catà on postesin riparà par passare l'inverno e poder, cussì, rompare le bale anca a primavera?
Beh... Murigno l'è simpatico come chel cimice. Par el momento. Parché xe sicuro ch'el migliorarà: tranquillo!
Come pole essare simpatico uno che se caga adosso par tuta la partia e par el gol catà al'ultimo minuto el deventa sbrufon de colpo?
Ma non voio butarlo massa zo. Non va ben, poareto. Ghe sarà sempre qualche d'un che lo giudica ben... ah sì... senz'altro. Anzi: ghe ne son sicuro: i xe i stessi interisti che fin a qualche mese fa i stravedea par Ibraimovic e i disea chel meritava el balon de oro. Adesso i ghe ne dise peste e corni.
Comunque, se sa ben che questo non xe altro che uno dei tanti episodi che acompagnarà Murigno da chi a quando che sarà finio el campionato e la Cempions Lig. E anca se ala fine nol le vinzarà stè sicuri che el pì bravo sarà sta lu.
E anca la Juve la ga petà le strasse. Eh sì. I torna a casa con la coa in mezo ale gambe e ringraziando che in contropiè non i ne ga becà qualche altro. Beh... cossa che non ga fato el picoleto... sì, quelo che fa da ridare su Colorado Cafè: Micoli!
E l'è alto on metro e venti. Seto sel fusse normale che salatada chel gavaria tacà ai iuventini?
Fato sta che tra on pirla e on fesso ga vinto el pirla e staltro l'è sta fato fesso da Zenga, che l'è l'unico alenatore (beh... alenatore... non esageremo desso) che ghe leca el culo a Murigno.
Va ben... intanto assemo che i se la goda sti pirla chi. Domenega che vien non ghe xe la serie A e se pol andare a castagne. E se a sera se cataremo con dei bei maroni grossi non sarà parché ne li ga fati vegnere Murigno.
04 otobre 2009
Atalanta - Milan 1 a 1
Atalanta in 10 dal 38° del primo tempo
Ah.... poro Milan. Ormai vardare na partia de sta squadra xe deventà on suplizio.
Nonostante tuto, par on motivo o par l'altro, però, le xe sempre partie da farghe vedare ai toseti che se avvia a zugare a calcio. Qualche ano fa se ghe mostrava le partie del grande Milan par insegnarghe a sti toseti come che se zuga el bel calcio. Desso se continua a mostrarghele con l'avertimento da parte del genitore o del mister che, chi che zuga cussì, va finire in panchina e xe meio chel taca le scarpe al ciodo.
Tra l'altro, so de certe mame che par farse scoltare dai pargoli i li minacia de mostrarghe le smorfie de Galiani a ste ultime prove dela squadra.
Insoma... de chi xele le colpe de sta situazion?
Mah... ognuno vol dire la soa e le opinion, se sa, le xe come el buso del culo. Ognuno ga el so e ghe xe chi che fa tanto rumore e chi che inveze xe pì silenzioso, chi che le spara grosse e chi che se limita a scoltare, quele che fa scalpore e quele che passa inosservà.
Mi non digo gnente... ghe xe za tanti tromboni che dise la soa. Vedaremo nando avanti.
Certo che el profumo dela vitoria xe n'altra roba.