Provemo a rancurare, so sta pagina qua, i vari articoleti che, domenega dopo domenega, vegnarà scriti sui avenimenti sportivi.
A fine staion vedemo che efeto che farà andare a rivedarseli.
10 genaio 2010
El Burigno amete el so culo
Nol volea... no no... nol volea dirlo...
Ma dopo essare sta drio perdare a du minuti dala fine, in casa contro l'ultima in classifica, e catarse a fine partia con 3 punti in scassela... nol ga podesto non dirlo.
Go avu culo!
Eco: adesso chel ga dito questo, xelo deventà pì simpatico?
Beh... forse xe meio dire:
adesso chel ga dito questo, xelo deventà manco antipatico?
Mah, a pensarghe ben, a valutare tuta la so presenza in Italia e tute le dichiarazion fate in tel corso de sta eternità (quando che te ghè on fastidio el tempo non passa mai), mi diria proprio de no!
Pitosto, me xe deventà simpatico Ferara, che inveze de farse i cassi sui (el dovaria avergane in bisognon solo co quei) el ga la voia, dopo avergane ciapà 3 in casa contro el Milan, de nare a barufare con Maifredi. Ve lo ricordeo col gera ala Juve? Nemo, dai... che ve ricordè sì! Xe sta quando che la Juve xe sta lì lì par nare in B senza che ghe la mandesse l'Inter, ma proprio par meriti sui....
Va ben...
tante ciacole e basta. Speremo chel tempo se sistema e che i torna a zugare in Inghiltera, che quele sì le xe squadre che me piase vedare zugare...
Visto che domenega i xe sta fermi, so nà a vedare na partia de calcio locale. Merlara Quadrifoglio. So na paltanela che gera spasso vedarli cascare in tera. Eh sì... infati de calcio se nà visto poco e l'unico spetacolo xe sta le barufe tra sti tosati che se ne ga tacà tante e promesse altretante. Ga vinto i merli par 2 a 1 par via de on gol da comiche che podì vedare anca voialtri sol video qua soto. Proprio par questo la me simpatia la va totalmente al Quadrifoglio (che meno male che i se ciama cussì, parché za co sto nome i ga na sfiga pazzesca, non oso pensare a come che i saria se i se ciamesse, ad esempio, Gatomoro?)